एक सय ५० जनाको ज्यान गएपछि श्रीलंकामा राष्ट्रिय आपतकालको घोषणा

काठमाडौं । झण्डै एक सय ५० जनाभन्दा धेरैको ज्यान गएपछि श्रीलंकामा राष्ट्रिय आपतकालको घोषणा गरिएको छ । शनिबार डिट्वा चक्रवातका कारण आएको बाढी र पहिरोमा १५३ जनाको मृत्यु भएको पुष्टि भएको छ भने उद्धार टोलीहरूले पृथक समुदायहरूमा पुग्न संघर्ष गरिरहेको अवस्थामा कम्तीमा २०० जना अझै बेपत्ता भएको बताएका छन् । अवस्था गम्भीर बन्न थालेपछि केन्द्रीय सरकारले शनिबार देशमा आपतकालको घोषणा गरेको हो ।

विपद् व्यवस्थापन केन्द्रका अनुसार बाढीमा परी २० हजारभन्दा बढी घरहरू ध्वस्त भएका छन्, जसबाट ७८ हजारभन्दा बढी मानिसहरू देशभरका लगभग आठ सय राहत केन्द्रहरूमा बस्न बाध्य भएका छन्। एक हप्ताको मुसलधारे वर्षाले घर, खेत र सडकहरू डुबानमा पारेपछि राष्ट्रपति अनुरा कुमार दिसानायकेले राहत र पुनर्लाभ प्रयासहरूलाई तीव्र बनाउन आपतकालीन शक्तिहरू प्रयोग गरेका थिए, जसले गर्दा व्यापकरूपमा पहिरो पहिरो समेत थपिएको थियो । श्रीलंकाको पूर्वमा बनेको चक्रवात डिट्वा आइतबारसम्म भारतको दक्षिणी तटतिर सर्ने अपेक्षा गरिएको छ।