अमेरिकाले भेनेजुएलाका राष्ट्रपति मदुरोलाई कहाँ राखेको छ ?

काठमाडौँ – भेनेजुएलाका राष्ट्रपति निकोलस मदुरो र उनकी पत्नीलाई हेलिकप्टरमार्फत न्यु योर्कस्थित ब्रुकलिनको मेट्रोपोलिटन डिटेन्सन सेन्टरमा लगिएको भन्ने खबर आए पनि उनीहरू त्यहाँ पुगेको आधिकारिक पुष्टि भने अझै नभएको बीबीसीले जनाएको छ ।

यसअघि अमेरिकी सञ्चारमाध्यमहरूले राष्ट्रपति मदुरो दम्पतीलाई हिरासत केन्द्रतर्फ लगिँदै गरेको जानकारी दिएका थिए । यद्यपि, सम्बन्धित निकायबाट औपचारिक पुष्टि आउन बाँकी रहेको बीबीसीले जनाएको छ ।

यसैबीच, ह्वाइट हाउसको ‘र्‍यापिड रिस्पोन्स’ सामाजिक सञ्जालले न्यु योर्कस्थित म्यानह्याटनको डीईए (DEA) मुख्यालयमा पहिले खिचिएको बताइएको एक भिडियो पुनः प्रसारण गरेको छ । उक्त भिडियोमा राष्ट्रपति मदुरोलाई सुरक्षा घेराबीच अघि बढाइँदै लगिएको देखिन्छ ।

त्यहाँ उनले ‘शुभरात्रि’ भन्दै नयाँ वर्षको शुभकामनासमेत दिएका छन् ।

अमेरिकी अधिकारीहरूले मदुरोमाथि लगाइएका आरोप र अबको कानुनी प्रक्रियाबारे थप विवरण सार्वजनिक गर्ने बताएका छन् ।