अमेरिकामा ह्वाइट हाउसनजिक गोलाबारी, दुई राष्ट्रिय गार्डसहित थुप्रै घाइते 

काठमाडौं । अमेरिकाको वासिङ्टन डीसीमा ह्वाइट हाउसनजिकैको उच्च सुरक्षा क्षेत्रमा गोलाबारी भएको छ । यो गोलाबारीमा दुईजना राष्ट्रिय गार्डसहित धेरै व्यक्ति घाइते भएका छन् ।

स्थानीय समय अनुसार बुधबार वासिङ्टन डीसीको डाउनटाउन इलाकामा यो घटना भएको बताइएको छ ।

घटनापछि प्रहरीले सम्बन्धित क्षेत्र तुरुन्तै घेराउ गरेको र सामान्य नागरिकहरूलाई त्यस क्षेत्रबाट टाढा रहन अनुरोध गरेको छ ।

अधिकारीहरूले दुई वेस्ट भर्जिनिया राष्ट्रिय गार्ड सदस्यहरू गम्भीर घाइते भएका बताएका छन् । वासिङ्टन डीसीकी मेयर मुरिएल बाउसेरले यो आक्रमण लक्षित गोलाबारी भएको बताएका छन् ।

यो घटनासँग सम्बन्धित अधिकारीहरूले सीएनएनलाई जानकारी दिँदै प्रारम्भिक पहिचानअनुसार आक्रमणकारी अफगानिस्तानबाट सन् २०२१ मा अमेरिकामा आएका व्यक्ति भएको बताएका छन् ।

राष्ट्रपति डोनाल्ड ट्रम्पले अपराधविरुद्धको अभियानअन्तर्गत धेरै राज्यका राष्ट्रिय गार्डहरू महिनौँदेखि वासिङ्टन डीसीमा तैनाथ रहेको बताएका छन् । यसको विस्तार देशका अन्य सहरहरूमा पनि गरिएको बताएका छन् ।

ह्वाइट हाउसनजिक गोलीबारी भएपछि राष्ट्रपति ट्रम्पले प्रतिक्रिया दिँदै भने, “जो जनावरले दुई राष्ट्रिय गार्डलाई गोली हान्यो, उसले ठूलो मूल्य तिर्नुपर्नेछ । दुवै राष्ट्रिय गार्ड गम्भीर रूपमा घाइते भएका छन् र दुई फरक अस्पतालमा भर्ना भएका छन् ।” सीएनएन