इरानसँगको द्वन्द्व चाँडै टुंग्याउनेतर्फ किन आतुर छन् ट्रम्प ?

काठमाडौं । अमेरिकी राष्ट्रपति Donald Trump इरानसँग जारी तनावपूर्ण द्वन्द्वलाई छिट्टै अन्त्य गर्ने रणनीतिमा केन्द्रित भएको अन्तर्राष्ट्रिय सञ्चारमाध्यमहरूले जनाएका छन्। The Wall Street Journal को एक रिपोर्टअनुसार ट्रम्प प्रशासनले आफ्नो युद्धनीतिमा केही परिवर्तन गर्दै दीर्घकालीन भिडन्तभन्दा छिटो समाधानतर्फ ध्यान दिएको देखिएको छ।

रिपोर्टमा उल्लेख भएअनुसार, ‘अपरेशन एपिक फ्युरी’ लाई छोटो समयमै समापन गर्ने मनसाय ट्रम्पले आफ्ना निकट सहयोगीहरूसँग व्यक्त गरेका छन्। विशेषगरी Strait of Hormuz पुनः पूर्ण रूपमा सञ्चालनमा ल्याउने विषय अहिलेको प्राथमिकतामा नरहेको संकेत दिइएको छ।

सुरक्षाविद्हरूका अनुसार उक्त जलमार्गमा पूर्ण नियन्त्रण कायम गर्नु चुनौतीपूर्ण मात्र नभई समय खपत हुने काम हो, जसले द्वन्द्व झन् लम्बिन सक्ने जोखिम पनि बढाउँछ। यस्तो अवस्थामा इरानले ऊर्जा आपूर्तिको अत्यन्त महत्वपूर्ण मार्गमा आफ्नो प्रभाव कायम राख्ने सम्भावना रहने बताइएको छ।

हालसम्म जलमार्ग आंशिक रूपमा अवरुद्ध हुँदा नै विश्व बजारमा तेल आपूर्ति प्रभावित भई मूल्यमा उल्लेख्य वृद्धि भइसकेको छ। यद्यपि, आवश्यक परे भविष्यमा सैन्य विकल्प प्रयोग गरेर मार्ग खोल्ने सम्भावना भने पूर्ण रूपमा नकारिएको छैन।

आन्तरिक छलफलहरूमा ट्रम्प टोलीले बल प्रयोग गरेर तत्कालै जलमार्ग खोल्ने प्रयास गर्दा समग्र रणनीतिक लक्ष्यमा असर पर्न सक्ने निष्कर्ष निकालेको बताइएको छ। त्यसैले अहिलेको ध्यान इरानको नौसैनिक र मिसाइल क्षमतामा कमजोरी ल्याउनेतर्फ केन्द्रित गरिएको छ।

यसैबीच, जलमार्गको सुरक्षाका लागि युरोपेली तथा खाडी मुलुकहरूलाई जिम्मेवारी दिन सकिने विकल्पसमेत छलफलमा रहेको जनाइएको छ।