इरानमाथि इजरायल–अमेरिकाको सैन्य हमलापछि सुनचाँदीको भाउ ह्वात्तै बढ्यो

काठमाडौँ। इजरायल र अमेरिकाले संयुक्त रूपमा इरानमाथि सैन्य कारबाही गरेपछि अन्तर्राष्ट्रिय बजारमा बहुमूल्य धातुको मूल्य ह्वात्तै बढेको छ। मध्यपूर्व क्षेत्रमा बढ्दो तनावका कारण लगानीकर्ता सुरक्षित लगानी साधन खोज्न थालेसँगै सुन र चाँदीको मूल्यमा एकैदिन उल्लेखनीय वृद्धि देखिएको हो।

उपलब्ध तथ्यांकअनुसार अन्तर्राष्ट्रिय बजारमा सुनको मूल्य प्रतिऔंस ५,२७८.१ अमेरिकी डलरसम्म पुगेको छ। यो अघिल्लो कारोबारको तुलनामा १००.५८ डलर अर्थात् करिब १.९४ प्रतिशतको वृद्धि हो। विश्लेषकहरूका अनुसार एकैदिन यति ठूलो उछाल आउनु भू–राजनीतिक अस्थिरताको प्रत्यक्ष परिणाम हो।

चाँदीको मूल्यमा पनि तीव्र वृद्धि देखिएको छ। चाँदी प्रतिऔंस ९३.७२ डलरसम्म पुग्दा यसको मूल्य करिब ७.६ प्रतिशतले बढेको छ। विश्व अर्थतन्त्रमा अनिश्चितता बढिरहेका बेला मध्यपूर्वमा चर्किएको द्वन्द्वले लगानीकर्तालाई सुनचाँदीजस्ता सुरक्षित सम्पत्तितर्फ आकर्षित गरेको बताइन्छ।

तथ्यांकले देखाएअनुसार पछिल्ला ६ महिनामा सुनको मूल्य करिब ५१ प्रतिशतले उकालो लागेको छ भने एक वर्षको अवधिमा ८१ प्रतिशतभन्दा बढी वृद्धि भइसकेको छ। पाँच वर्षमा सुनको भाउ झन्डै तीन गुणा बढ्दा २० वर्षको दीर्घकालीन अवधिमा ८३० प्रतिशतभन्दा धेरै वृद्धि देखिएको छ।

अन्तर्राष्ट्रिय विश्लेषणअनुसार इजरायल–इरान तनावमा अमेरिका प्रत्यक्ष रूपमा जोडिएपछि तेल आपूर्ति, विश्व व्यापार र मुद्रास्फीतिमा सम्भावित असर पर्ने चिन्ताले बजारमा अस्थिरता बढाएको छ। जबसम्म क्षेत्रीय अवस्था सहज हुँदैन, तबसम्म सुनको मूल्य उच्च विन्दुमै रहने वा अझै बढ्न सक्ने अनुमान गरिएको छ।

यस अन्तर्राष्ट्रिय मूल्यवृद्धिको प्रभाव नेपाली बजारमा पनि देखिने सम्भावना छ। विश्व बजारमा भएको उकालोसँगै स्थानीय सुन बजारमा नयाँ रेकर्ड कायम हुने संकेत देखिएको छ, जसले लगानीकर्ता तथा उपभोक्तालाई प्रत्यक्ष असर पार्न सक्छ।