‘नेपालले पनि केही ठाउँमा भारतीय भूमि मिचेको तथ्य भेटियो’ – प्रधानमन्त्री शाह

काठमाण्डौं । प्रधानमन्त्री बालेन्द्र शाहले नेपाल–भारत सीमा विवादलाई एकपक्षीय रूपमा मात्र हेर्न नहुने भन्दै नेपालले पनि केही स्थानमा भारतीय भूमि अतिक्रमण गरेको तथ्य सरकारलाई जानकारीमा आएको बताएका छन् ।

प्रतिनिधिसभाको बैठकमा सांसदहरूले उठाएका प्रश्नको जवाफ दिने क्रममा प्रधानमन्त्री शाहले सीमा समस्यालाई भावनात्मक नाराभन्दा पनि तथ्य, नक्सा, इतिहास र कूटनीतिक संवादका आधारमा समाधान गर्नुपर्ने धारणा राखेका हुन् ।

उनले प्रधानमन्त्रीको जिम्मेवारी सम्हालेपछि विभिन्न निकायबाट प्राप्त विवरण, नक्सा तथा प्राविधिक अध्ययनहरू हेर्दा सीमा विवादका विषयमा नेपालभित्र प्रचलित बुझाइभन्दा फरक तथ्यहरू पनि भेटिएको बताए ।

सीमासम्बन्धी विषयमा सरकार गम्भीर रहेको उल्लेख गर्दै उनले दुवै देशका दाबी र वास्तविक अवस्थाको वस्तुगत अध्ययन आवश्यक रहेको बताए ।

प्रधानमन्त्री शाहले नेपाल र भारतबीचका सीमा विवाद दशकौँ पुरानो विषय भएको उल्लेख गर्दै यसको समाधानका लागि भावनाभन्दा प्रमाण र कूटनीतिक संयमताको आवश्यकता पर्ने बताए ।

उनले सीमाका विषयमा राष्ट्रिय हित सर्वोपरि हुने स्पष्ट पार्दै सरकार कुनै पनि तथ्यलाई लुकाउने वा राजनीतिक लाभका लागि प्रयोग गर्ने पक्षमा नरहेको जिकिर गरे ।