एन्फा नेतृत्वविरुद्ध ९३ लाखको भ्रष्टाचार र खेल मिलेमतो मुद्दा दायर

काठमाडौं– अखिल नेपाल फुटबल संघ (एन्फा) का वर्तमान नेतृत्वविरुद्ध ९३ लाख रुपैयाँभन्दा बढीको आर्थिक अनियमितता, ठगी तथा खेल मिलेमतो (म्याच फिक्सिङ)को अभियोगमा जिल्ला अदालत ललितपुरमा मुद्दा दायर गरिएको छ ।

नेपाल प्रहरीको केन्द्रीय अनुसन्धान ब्यूरो (सीआईबी) ले गरेको छानबिन तथा राष्ट्रिय खेलकुद परिषद् (राखेप) र एन्फाका तत्कालीन प्रशासनिक अधिकृत वसन्त रिजालको जाहेरीका आधारमा जिल्ला सरकारी वकिल कार्यालय ललितपुरले मुद्दा दर्ता गराएको हो ।

सरकारी वकिल कार्यालयले दायर गरेको अभियोगपत्रमा एन्फा अध्यक्ष पंकजविक्रम नेम्वाङ, महासचिव किरण राई, कोषाध्यक्ष रवीन्द्र जोशी र लेखा अधिकृत सञ्जीव पाण्डेलाई प्रतिवादी बनाइएको छ। प्रतिवादीहरूमध्ये कोषाध्यक्ष जोशी र लेखा अधिकृत पाण्डे पक्राउ परी प्रहरी हिरासतमा रहेका छन् भने अध्यक्ष नेम्वाङ र महासचिव राई हाल फरार सूचीमा रहेका छन् । फरार रहेका पदाधिकारीहरूको हकमा अदालतबाट म्याद जारी गर्न अनुरोध गरिएको छ ।

अनुसन्धान अनुसार प्रतिवादीहरूबाट कुल ९३ लाख ९ सय रुपैयाँ बिगो कायम गरी असुलउपर गर्न माग गरिएको छ । यसमा एन्फाको आर्थिक कार्यविधि विपरीत खुला टेन्डर नगरी खेल सामग्री खरिद गर्दा पुर्‍याइएको ५० हजार अमेरिकी डलर (नेपाली रुपैयाँ ६६ लाख ५३ हजार ९ सय) र नेपाल–बहराइन खेल बहराइनमा खेलाएबापत प्राप्त हुनुपर्ने २० हजार अमेरिकी डलर (नेपाली रुपैयाँ २६ लाख ४७ हजार) गरी कुल बिगो रकम तय गरिएको छ ।