सिद्धार्थ बैंकले बोनस सेयर र नगद लाभांश दुवै दिने

काठमाडौं – सिद्धार्थ बैंक लिमिटेडले आफ्ना सेयरधनीलाई लाभांश वितरण गर्ने प्रस्ताव गरेको छ। सञ्चालक समितिको बैठकले आर्थिक वर्ष २०८२-८३ को नाफाबाट सेयरधनीलाई बोनस सेयर तथा नगद लाभांश वितरण गर्ने प्रस्ताव गरेको हो। प्रस्तावित लाभांश नेपाल राष्ट्र बैंकको स्वीकृति तथा बैंकको आगामी वार्षिक साधारण सभाबाट पारित भएपछि सेयरधनीले प्राप्त गर्नेछन्।

बैंकले १० प्रतिशत बोनस सेयर वितरण गर्ने प्रस्ताव गरेको छ। बोनस सेयरबापत करिब १ अर्ब ४७ करोड ९४ लाख रुपैयाँ बराबरको रकम वितरण हुने बैंकले नेप्सेलाई लेखेको पत्रमा उल्लेख छ। त्यस्तै, बोनस सेयर तथा नगद लाभांशमा लाग्ने कर प्रयोजनका लागि पनि १० प्रतिशत बराबरको नगद लाभांश प्रस्ताव गरिएको छ।

अग्राधिकार सेयरधनीका लागि भने ५.२५ प्रतिशत नगद लाभांश प्रस्ताव गरिएको छ। बैंकले उक्त प्रस्ताव नियामक निकायको स्वीकृति र वार्षिक साधारण सभाबाट अनुमोदन भएपछि कार्यान्वयनमा जाने जनाएको छ। बैंकको हाल कायम चुक्ता पुँजी साधारण सेयरतर्फ करिब १४ अर्ब ७९ करोड रुपैयाँ र अग्राधिकार सेयरतर्फ ३ अर्ब ५० करोड रुपैयाँ रहेको छ।