आगजनीबाट ध्वस्त बनेका भाटभटेनी फेरि उठ्यो : ध्वस्त १२ मध्ये १० स्टोर पुनःसञ्चालन

काठमाण्डौ । आगजनीबाट ध्वस्त बनेका आफ्ना स्टोरहरूलाई क्रमशः पुनर्जीवन दिँदै आएको भाट–भटेनी सुपर मार्केटले काठमाण्डौको टंगालस्थित स्टोर पनि पुनः सञ्चालनमा ल्याउने भएको छ।

भाट–भटेनीका अनुसार टंगालस्थित सुपर स्टोर असोज ५ गते सोमबार बिहान १० बजेदेखि औपचारिक रूपमा पुनः सञ्चालनमा आउनेछ। त्यसपछि स्टोरले दैनिक रूपमा नियमित सेवा प्रदान गर्ने कम्पनीका प्रमुख सञ्चालन अधिकृत पानु पौडेलले जानकारी दिएका छन्।

टंगाल स्टोर पुनः सञ्चालनमा आएसँगै आगजनीबाट ध्वस्त भएका भाट–भटेनीका १२ वटा स्टोरमध्ये १० वटा पुनः सञ्चालनमा आउनेछन्। बाँकी दुईवटा दमक र हेटौँडाका स्टोर पनि पुनर्निर्माणको अन्तिम चरणमा रहेको कम्पनीले जनाएको छ।

दमक र हेटौँडाका स्टोरमा संरचनागत सुधार, उपकरण व्यवस्थापन तथा आन्तरिक निर्माणको काम भइरहेको छ। पुनर्निर्माणमा गुणस्तर र दीर्घकालीन सञ्चालनलाई विशेष ध्यान दिइएको उल्लेख गर्दै कम्पनीले ती स्टोरबाट पनि छिट्टै ग्राहक सेवा सुरु गर्ने लक्ष्य राखेको जनाएको छ।