प्रधानमन्त्री शाहलाई व्यक्तिगत सन्देश पठाएपछि सचिव कृष्णहरि पुस्कर जगेडामा

काठमाडौं – उपराष्ट्रपतिको कार्यालयमा कार्यरत सचिव कृष्णहरि पुस्करलाई मन्त्रिपरिषद् तथा प्रधानमन्त्री कार्यालयमा सरुवा गर्दै जगेडामा राखिएको छ ।

प्रधानमन्त्री तथा मन्त्रिपरिषद् कार्यालयले शुक्रबार पुस्करलाई उपराष्ट्रपति कार्यालयबाट प्रधानमन्त्री कार्यालयमा सरुवा गरेको हो । सरुवासँगै उनलाई कुनै जिम्मेवारी नदिई जगेडामा राखिएको स्रोतले जनाएको छ।

प्रधानमन्त्री कार्यालयका एक उच्च अधिकारीका अनुसार पुस्करको स्थानमा हालसम्म नयाँ सचिव पठाइएको छैन । उनका अनुसार सोमबार उपराष्ट्रपति कार्यालयमा नयाँ सचिव खटाइने तयारी छ ।

पुस्करलाई प्रधानमन्त्री बालेन्द्र शाहलाई व्यक्तिगत सन्देश पठाएको विषयमा बिहीबार प्रहरीले नियन्त्रणमा लिएर करिब सात घण्टा केरकार गरेको थियो । केरकारपछि उनी रिहा भएका थिए ।

प्रहरी अनुसन्धानबाट मुक्त भएको भोलिपल्टै सरकारले उनलाई जिम्मेवारीबाट अलग गर्दै जगेडामा राख्ने निर्णय गरेको हो । पुस्कर आगामी असार २४ गते सचिव पदमा पाँच वर्षे कार्यकाल पूरा गरी अनिवार्य अवकाशमा जाँदैछन्।