ओलीले व्यङ्ग्य गर्दै भने – ‘नक्कली भगवान् जन्मिएर हैरान छ’

काठमाडौं– नेकपा एमालेका अध्यक्ष केपी शर्मा ओलीले समाजमा ‘नक्कली भगवान्’ जन्मिने क्रम बढेको भन्दै व्यङ्ग्य गरेका छन् । आफ्नै ज्ञान र विद्वान्लाई चिन्न नसक्ने तर बाहिरबाट आउने व्यक्तिलाई सहजै देवत्वकरण गर्ने प्रवृत्तिप्रति पनि उनले टिप्पणी गरेका छन् ।

मंगलबार काठमाडौंमा मदन भण्डारी स्मृति प्रतिष्ठान नेपालको स्मारिका लोकार्पण कार्यक्रममा सम्बोधन गर्दै ओलीले देवताहरूको जन्मसम्बन्धी पौराणिक प्रसङ्ग जोडेर ‘नक्कली भगवान्’माथि कटाक्ष गरेका हुन् ।

‘२२–२३ सय वर्षअघि भगवान्हरू छ्यासछ्यासती जन्मिँदा तेत्तीसकोटी जन्मिए । धन्न पार्वतीले श्राप दिइछन् र देवता जन्मिन पाएनन्,’ ओलीले भने, ‘अब कुनै देवताको पनि सन्तान नहोस् भनेपछि ठप्प भए देवताहरू, तर पार्वतीले श्राप दिएपछि फेरि नक्कली भगवान् जन्मिएर हैरान छ ।’

ओलीले नेपाली समाजमा विदेशी वा दक्षिणतिरबाट आउने जोगीलाई विशेष सम्मान गर्ने, तर आफ्नै देशका विद्वान्लाई बेवास्ता गर्ने प्रवृत्ति रहेको बताए ।