उपसभापति विश्वप्रकाश शर्माले भने – ‘कांग्रेस अझ बलियो, ऊर्जाशील र नयाँ पुस्ताको भावना समेटेर अगाडि बढ्छ’

काठमाडौँ – नेपाली कांग्रेसका उपसभापति विश्वप्रकाश शर्माले जारी १५औँ महाधिवेशन पार्टीको नयाँ यात्राको सुरुवात भएको बताउँदै महाधिवेशनपछि कांग्रेस अझ बलियो, ऊर्जाशील र नयाँ पुस्ताको भावना समेटेर अगाडि आउने दाबी गरेका छन्।

काठमाडौँको खुलामञ्चमा आयोजित महाधिवेशनको उद्घाटन समारोहलाई सम्बोधन गर्दै उपसभापति शर्माले बीपी कोइरालाको नेतृत्वमा स्थापित ८० वर्षको इतिहास बोकेको कांग्रेसले लोकतान्त्रिक आन्दोलनसहित मुलुकका हरेक सङ्कटमा नेतृत्वदायी भूमिका निर्वाह गरेको उल्लेख गरे।

राष्ट्रिय स्वतन्त्र पार्टीको नेतृत्वमा बहुमतको सरकार बनेपछि कांग्रेस प्रमुख प्रतिपक्षी दलको भूमिकामा रहेको स्पष्ट पार्दै शर्माले राष्ट्रिय हित र विकासका मुद्दामा सरकारसँग हातेमालो गर्न कांग्रेस तयार रहेको बताए। “मुलुकलाई सफल बनाउन र राष्ट्रिय हितका महत्त्वपूर्ण विषयमा सबै राजनीतिक दलहरू एक ठाउँमा उभिनुपर्छ,” उनले भने।