१८ दिनपछि कृष्णभीरमा दुईतर्फी यातायात सञ्चालनमा

काठमाडौं– १८ दिनदेखि अवरुद्ध पृथ्वी राजमार्गको कृष्णभीर सडकखण्डमा आज बिहानदेखि दुईतर्फी यातायात सञ्चालनमा आएको छ। सडक भासिएपछि नयाँ ट्र्याक खोलेर यातायात सञ्चालनमा ल्याइएको हो।

गत भदौ १० गते भोटेकोशीमा आएको बाढीपछि त्रिशूली नदीमा पानीको बहाव बढेको थियो। भदौ १४ गते पुनः आएको बाढीले कृष्णभीरलगायत पृथ्वी राजमार्गका विभिन्न स्थानमा सडक भासिएको थियो। अन्य स्थानमा यातायात सहज भए पनि कृष्णभीरमा सडक पूरै भासिएपछि आवागमन प्रभावित बनेको थियो।

सडक अवरुद्ध भएपछि गत भदौ १८ गतेदेखि नजिकै रहेको ढिस्को काटेर नयाँ ट्र्याक खोल्ने काम सुरु गरिएको थियो। नागढुङ्गा–मुग्लिन सडक योजना (पश्चिम खण्ड)का इञ्जिनियर धीरज ढकालका अनुसार बुधबार साँझसम्म काम सम्पन्न भएपछि आज बिहानदेखि सडक नियमित रूपमा सञ्चालनमा ल्याइएको हो।