जसलाई पाता कस्नुपर्छ भनेकी थिइन्, उनीहरूकै दबाबमा गौरीकुमारीले गुमाइन् मन्त्री पद

काठमाडौं- ग्यास उद्योगीप्रति आक्रोश पोख्दै ‘पाता कस्नुपर्ने’ अभिव्यक्ति दिएको भोलिपल्टै उद्योग, वाणिज्य तथा आपूर्तिमन्त्री गौरीकुमारी यादवको पद गएको छ।

मन्त्री यादवले बिहीबार उद्योगीबारे दिएको अभिव्यक्तिका कारण प्रधानमन्त्री वालेन्द्र शाह चर्को दबाबमा परेका थिए ।

देशभर करिब एक महिनादेखि खाना पकाउने एलपी ग्यासको अभाव भइरहेका बेला आपूर्ति व्यवस्थापन गर्न नसकेको भन्दै आलोचना खेपिरहेकी यादवले राजीनामा दिनुअघि बुधबार संसदीय समितिको बैठकमा ग्यास उद्योगीप्रति कडा आक्रोश पोखेकी थिइन्।

बुधबार सिंहदरबारमा बसेको उद्योग तथा वाणिज्य र श्रम तथा उपभोक्ता हित समितिको बैठकमा बोल्दै मन्त्री यादवले ग्यासको आपूर्ति सहज बनाउन उद्योगीमाथि कडाइ गर्नुपर्ने बताएकी थिइन्।‘उद्योगीहरूलाई पाता नफर्काएसम्म ग्यास सहज हुँदैन,’ उनले बैठकमा भनेकी थिइन्। उनले निरीहता प्रकट गर्दै ग्यास दिन नसकेकोमा आफूलाई लाज लागेको बताएकी थिइन् ।

उनले नेपालमा आवश्यकताभन्दा बढी एलपी ग्यास उद्योग सञ्चालनमा रहेको दाबी गर्दै अहिले रहेका ५८ वटा ग्यास उद्योगको संरचनामाथि पुनर्विचार गर्नुपर्ने बताएकी थिइन्। हाम्रोजस्तो देशमा दुईवटाभन्दा बढी ग्यास उद्योग आवश्यक नरहेको उनको भनाइ थियो।

ग्यास उद्योगको लाइसेन्स वितरण प्रक्रियामाथि समेत प्रश्न उठाउँदै उनले ५८ वटा उद्योग किन आवश्यक परेको भन्दै उद्योगीहरूलाई करोडौँ रुपैयाँ लिएर लाइसेन्स दिइएको बताएकी थिइन्।