भोटेकोशी बाढीमा ५३८ जनाको शव बरामद, ३३ देशका ५११ विदेशी अझै बेपत्ता

काठमाडौं– रसुवाको भोटेकोशी नदी क्षेत्रमा गत बुधबार आएको विनाशकारी बाढीमा परी हालसम्म ५३८ जनाको शव बरामद गरिएको सरकारले जनाएको छ ।

परराष्ट्र मन्त्रालयले शुक्रबार अपराह्न ३ बजे अद्यावधिक गरेको विवरणअनुसार बाढीपछि ३३ देशका ६३२ जना विदेशी नागरिक प्रभावित भएकोमा १२१ जना फेला परेका छन् भने ५११ जना अझै बेपत्ता छन् ।

मन्त्रालयले विदेशी नागरिकसम्बन्धी तथ्यांक खोज तथा उद्धार कार्य जारी रहेकाले थप प्रमाणीकरण हुन सक्ने जनाएको छ ।

सबैभन्दा धेरै भारतका १७८ जना प्रभावित भएका छन्। तीमध्ये ८५ जना फेला परेका छन् भने ९३ जना अझै बेपत्ता छन्। त्यस्तै चीनका १०० जनामध्ये १६ जना फेला परेका छन् भने ८४ जना बेपत्ता छन् ।

त्यसैगरी अमेरिकाका ६८ मध्ये २ जना फेला परेका छन् भने ६६ जना बेपत्ता छन्। युक्रेनका ५३, मलेसियाका ५१, अस्ट्रेलियाका ३५, बेलायतका ३३ र क्यानडाका २५ जना अझै बेपत्ता रहेको मन्त्रालयले जनाएको छ ।

मन्त्रालयका अनुसार इटालीका दुई, दक्षिण कोरियाका नौ, स्विट्जरल्यान्डका एक र रुसका दुई तथा अन्य केही विदेशी नागरिक फेला परिसकेका छन् ।

बाढीबाट ठूलो जनधनको क्षति हुनुका साथै घर, सडक, पुल, जलविद्युत् आयोजना र अन्य महत्वपूर्ण पूर्वाधारमा व्यापक क्षति पुगेको छ ।

सरकारले सुरक्षा निकाय, विपद् व्यवस्थापन निकाय, स्थानीय तह तथा स्वास्थ्य सेवाका संयन्त्रलाई खोज, उद्धार, विस्थापितको व्यवस्थापन, आकस्मिक स्वास्थ्य सहायता र राहत कार्यमा परिचालन गरेको जनाएको छ ।

नदी प्रणाली तथा तल्लो तटीय क्षेत्रमा बाढीको जोखिमलाई निरन्तर निगरानीमा राखिएको मन्त्रालयले जनाएको छ ।