संसद चल्दा ल्यापटपमा सेयर कारोबार नगर्न सभामुखको निर्देशन

काठमाण्डौ । संसद बैठक चलेको बेला अब सांसदहरुले सेयर कारोबार गर्न नपाउने भएका छन् ।

संसद बैठक सञ्चालन भइरहेको बेला केही सांसदहरुले ल्यापटपमार्फत सेयर कारोबार गर्र्ने गरेको सूचना आएको भन्दै सभामुख डोलप्रसाद अर्याल (डिपी अर्याल)ले त्यस्ता गतिविधि नगर्न सांसदहरुलाई सचेत गराएका छन् ।

संसद्को मर्यादा र गरिमा कायम राख्नुपर्ने भन्दै सभामुख डोलप्रसाद अर्यालले बैठकमा सहभागी हुँदा सांसदहरूले आफ्नो जिम्मेवारी र आचरणप्रति गम्भीर हुनुपर्ने बताएका छन् ।

साथै सभामुख अर्यालले सांसदहरूको पोशाक, अनुशासन र व्यवहारसँगै संसद् बैठकमा देखिएका केही गतिविधिबारे पनि ध्यानाकर्षण गराएका थिए ।

बैठक चलिरहेका बेला केही सांसदहरूले ल्यापटप प्रयोग गरेर सेयर कारोबार गरेको सूचना आएको र संसद् भवनको लबीमा अनावश्यक भीडभाड गर्ने गरेको विषयमा सभामुखले असन्तुष्टि जनाएका थिए ।