सन्दीपको शानदार अर्धशतकमा आसामविरुद्ध नेपाल ‘ए’को लगातार दोस्रो जित

काठमाडौं – नेपाल ‘ए’ क्रिकेट टिमले आसाम प्रदेश क्रिकेट संघमाथि लगातार दोस्रो जित निकालेको छ। शनिबार राति सम्पन्न खेलमा सन्दीप जोराको शानदार अर्धशतकको साथमा नेपालले आसामलाई ९ रनले हराएको हो।

यो अभ्यास खेलको जितसँगै नेपालले ५ खेलको सिरिजमा २–१ को अग्रता लिएको छ। पहिलो खेलमा डक वर्थ लुइस (डीएल) पद्धतिका आधारमा १५ रनले पराजित भएको नेपाल दोस्रो खेलमा ९६ रनले विजयी भएको थियो।

शनिबार भएको खेलमा सुरुमा ब्याटिङ गरेको नेपालले आसामलाई १९७ रनको लक्ष्य दिएको थियो। टस हारेर सुरुमा ब्याटिङ गरेको नेपालले पूरै २० ओभर खेल्दै ६ विकेटको क्षतिमा १९६ रन बनाएको हो। नेपालका लागि सन्दीपले शानदार अर्धशतक बनाए। ४८ बलको सामना गरेका उनले ७४ रन बनाएका हुन्।