प्रधानमन्त्रीका विशेष सुरक्षा सल्लाहकार कार्कीले नियुक्तिपत्र बुझे, कार्यालयमा भने हाजिर भएनन्

काठमाडौं । प्रधानमन्त्री वालेन्द्र शाहका विशेष सुरक्षा सल्लाहकारमा नियुक्त भएका तत्कालीन प्रहरी महानिरीक्षक (आईजीपी) दानबहादुर कार्कीले नियुक्त भएकै दिन नियुक्तिपत्र बुझेको गृह मन्त्रालयले जनाएको छ।

मन्त्रिपरिषद्को गत कात्तिक १८ गते बसेको बैठकले मुलुकको शान्ति सुरक्षा व्यवस्थालाई थप सुदृढ बनाउने उद्देश्यसहित प्रधानमन्त्रीलाई सुरक्षा सम्बन्धी आवश्यक सल्लाह, सुझाव तथा परामर्श दिन कार्कीलाई विशेष सुरक्षा सल्लाहकारमा नियुक्त गर्ने निर्णय गरेको थियो। त्यसका लागि मन्त्रिपरिषद्ले प्रधानमन्त्रीको विशेष सुरक्षा सल्लाहकार पदसमेत सिर्जना गरेको थियो।

गृह मन्त्रालयका प्रवक्ता आनन्द काफ्लेका अनुसार कार्कीले कात्तिक १८ गते नै आफ्नो नियुक्तिपत्र बुझिसकेका छन्। तर, त्यसपछि तिहार तथा छठ पर्वका कारण लामो सार्वजनिक बिदा परेकाले उनी हालसम्म कार्यालयमा हाजिर हुन भने पाएका छैनन्।

कार्कीका लागि सिंहदरबारस्थित प्रधानमन्त्री तथा मन्त्रिपरिषद्को कार्यालयमा कार्यकक्षसमेत स्थापना गरिसकिएको छ।

प्रधानमन्त्रीका विशेष सुरक्षा सल्लाहकारका रूपमा कार्कीले मुलुकको समग्र सुरक्षा अवस्था, सम्भावित सुरक्षा चुनौती तथा शान्ति सुरक्षासँग सम्बन्धित विषयमा प्रधानमन्त्रीलाई आवश्यक परामर्श र सुझाव दिने जिम्मेवारी पाउनेछन्।

प्रतिक्रिया
सम्बन्धित समाचार